Filmbib: Sjå vestnorsk kort- og dokumentarfilm gratis
Fleire vestnorske kort- og dokumentarfilmar er tilgjengelege gratis på strøymetenesta Filmbib. Alle med nasjonalt lånekort på norske bibliotek kan logge seg inn med lånekortnummer og PIN-kode.
Dokumentaren Once Aurora, om popsensasjonen Aurora Aksnes frå Os, kan du sjå på filmbib.no.
Over 400 kort- og dokumentarfilmar ligg tilgjengelege for publikum hos Filmbib. Filmane er kjøpt inn av Norsk filminstitutt gjennom innkjøpsordninga for film.
Dokumentarfilmane Hva skjedde med Torstein Raaby? av Stian Indrevoll og Screen Story, og Aldeles og Frode Fimland sin Bergen - i all beskjedenhet, er blant dei mest populære filmane hos Filmbib akkurat no. Frå Fimland kan du i tillegg sjå dokumentaren John - den siste norske Cowboy, og frå Aldeles Tvillingsong regissert av Anne Tveit Knutsen. Av andre skattar finn du også dokumentarfilmane Once Aurora av Stian Servoss og Benjamin Langeland, produsert av Thorvald Nilsen, og Den siste filmen av Olaug Spissøy Kyvik og Karianne Førland Vennerød.
Bergen - i all beskjedenhet, den både sjølvironiske og poetiske dokumentaren og hyllesten til Bergen, signert Frode Fimland og Aldeles, er blant dei mest populære filmane på Filmbib.
Av kortfilmar kan du sjå Aninaut Studios sin kortanimasjon Drømmen om Hawaii, og Kodenavn: Nagasaki, samprodusert av Aldeles, og FROM.BEYOND, produsert av Perdurabo Productions, begge av regissør Fredrik S. Hana. Jan Otto Ertesvåg sin kortfilm Bergtatt, og Havnesjefen av Mia Ludvigsen Henriksen og Konrad Hjemli er også å sjå, og for dei minste; filmatiseringa av Bjørn Sortland si barnebok Zara og dei: Gorillahjerne til middag. Jade Hærem Aksnes sin kortfilm Grill blir også tilgjengeleg hos Filmbib, sannsynlegvis i løpet av våren.
Manglar du lånekort, eller har du gløymt PIN-koden?
Med eit nasjonalt lånekort kan du låne bøker og anna på biblioteket og få tilgang til det dei tilbyr digitalt, som gratis tilgang til Filmbib.
Dersom du manglar lånekort eller har gløymt PIN-koden, kan du logge deg inn hos Nasjonalbiblioteket på bibliotekkortet.no. Der kan du logge inn med BankID og bestille lånekort, endre PIN-kode og få tilgang til lånekortnummeret ditt.
